"Zero zabor filosofiari irmoki eutsiz, hausnarketa prozesuan" dago Arrasateko Udala

Martxo amaieran galdetegiak bidali zituen Udalak etxez etxe, hondakinen gaiaren gainean arrasatearrok zenbat dakigun, zerk kezkatzen gaituen eta arazoaren aurrean lehentasuna zeri ematen diogun jakiteko. Atzo, martitzena, egin zuten galdetegi horren emaitzen berri emateko agerraldia Josu Pereda Ingurumen zinegotziak eta Inazio Azkarragaurizar alkateak. Prentsaurrekoaren ostean adierazi zutenez, "hausnarketa prozesuan" daude baina zero zabor filosofiari "irmoki" eusten diotela jakinarazi zuten. Galdetegia 2.551 pertsonek bete dute; arrasatearren %14ak, gutxi gorabehera.