Lagun taldea sortu eta harremanak lantzeko; autonomia eta independentzia garatzeko, sedentarismoa gutxitu eta aktibismoa sustatzeko sortu zen ekimena eta domekan ikasleek naturarekin kontaktuan jartzea helburu zuten erronka batzuk burutu zituzten. Ondoren sorpresak izan ziren, bai ikasleentzat eta bai begiraleentzat.
Ekimenak izandako oihartzunak taldearen parte izateko interes handia piztu zuen Debagoienean, eta uste baino gazte gehiago dituzte. Hamabostekin hasteko asmoa bazuten ere, hogeita hamarrera zabaldu zuten plaza kopurua, eta hala ere itxaron zerrendan dituzte interesatu batzuk.
Joan den domekan, elkarri agur esateko Urkulu urtegiaren bueltan elkartu ziren. Bueltatxoa eman zuten han eta gero jatekoa prestatu Otala Zelain. Lagun giroan bazkalduta amaiera ezin borobilagoa eman diote ikasturteari.
Datorren ikasturtera begira, irailean bueltan izango dira, ekimenak utzitako sentsazio onengatik eta inguruan sortu duen interesagatik.
