Azaldu dutenez, denboraldiko egutegia osatzeko gelditzen ziren lasterketak egiteko onespena jaso dute, "kirol arduradunek eta agintari politikoek egin beharreko lanak egin ondoren". Beraz, aldaketarik ezean, irailaren 24an amaituko da. "Lortu da Gipuzkoako ziklismoak eskatzen zuena. Denboraldia normaltasunez bukatzeko egin beharrak egitera goaz". Bertan behera uzteko erabakiaren berri eman baitzuten pasa den zapatuan, Trafiko zuzendaritzatik "trabak" jartzen zizkielako eta arazoari ez ziolako irtenbiderik bilatzen.
Era berean, eskerrak eman dizkiete alboan izan dituztenei. "Bereziki, norbere buruan bakarrik pentsatu gabe, Gipuzkoako txirrindularitzan pentsatu eta guztiona zen arazoari, denok bat eginda irtenbidea bilatzen saiatu zaretenoi". Uste baitute gaur egungo gizartea "berekoia" dela, baina txirrindularitzak "bateratasuna" erakutsi duela. "Eredu ederra eman du".
