Aretxabaleta aurkaria baino gehiago izan da lehenengo zatian. Gola egiteko hainbat aukera izan ditu, baina ez ditu aprobetxatu. Hala, atsedenaldira 0-0 iritsi dira.
Bigarren zatian egin du gola Lagun Onakek
Bigarren zatian Lagun Onak indarra hartzen joan da. Sailkapeneko aurreneko postuetan zergatik dauden erakutsi dute azpeitiarrek; aukera asko egin gabe, egin dutena ondo aprobetxatu dute. Hala, baloia sareetan sartu eta markagailuan aurretik jarri dira. Ondoren, ondo jakin dute abantaila aprobetxatzen.
Partiduko azkeneko minutuetan etxeko taldeak aukera garbia izan du partidua berdintzeko baina jokaldia ezerezean geratu da.
Haritz Igartuaren hitzak
"Eurak baino gehiago izan gara baina ez dugu jakin gola egiten", azaldu du amaieran Haritz Igartua Aretxabaletako jokalariak. "Eta, gola egin ezean ez dago partidurik irabazterik", gaineratu du.
Nabarmendu du hirugarren mailan aukera guztiak aprobetxatu behar direla, ez dagoela "hutsik egiterik".
24. jardunaldian, Zalla
Aretxabaleta sailkapeneko 18. postuan dago 21 punturekin. Dagoeneko hurrengo asteko partiduari begira daude; Zallaren aurka jokatu beharko dute aretxabaletarrek.
