Aramaioko Udalaren ustez "onartezina da" Adifek desjabetzeen aurrean izan duen jokabidea

Aramaioko Untzilla auzoan Adifek egin behar dituen desjabetzeen gainean, Aramaioko Udalak azaldu du aipatutako desjabetzeak "berandu" datozela, eta gainera, "larritasunaren izenean", Adifek ez diela ez proiektua ezta prozedura ere azaldu. Hori "onartezina" dela dio Udalak. Gainera, Udalak eskatu dio behingoz amai ditzala egiteke dituen lanak eta herritarren segurtasuna berma dezala.

Udalaren oharra

Joan zen astean Estatuko Aldizkari ofizialean Adifek Untzillan egin behar dituen desjabetzeak argitaratu zituzten. Informazio horren inguruan, Aramaioko Udalak oharra plazaratu du. Hau diote: 

"Desjabetze hauek berandu datoz eta gainera larritasunaren izenean Adifek ez zigun ez proiektua ez ze prozedura erabili behar zuten azaldu, guk eskatu genion arte, eta gainera behin obrak hasita zeudela. Udalerri honetako udal gisa, uste dugu hau onartezina dela.

Aramaio herriak asko sufritu du 2008an gure udalerrian AHTaren obrak hasi zirenetik. Ordutik arazoak besterik ez ditugu izan. Obra berez amaituta egonda, otsailean horma bat eusten zuten gerrikoak apurtu ziren eta oraindik horma horren gainean dagoen baserrikoak etxetik kanpo egon beharra dauka.

Obra amaituta egonda gainera, oraindik ere ADIFek ez ditu gure udalerrian egin beharreko lanak amaitu, Aramaiori egin dizkion kalteak hor daude, bi auzo konpontzeko daude, mendi pista batzuk irteerarik gabe, ur emari asko galduta, urtebete Arrasaterako bidea itxita egoteak biztanleei sortu zizkien kalte-ordainak, …

Noiz arte jarraitu behar dugu sufritzen, ez dabilen eta eskatu ez dugun tren honen ondorioak? Orain artekoa ikusita zenbat eta noiz arte baldintzatu behar gaitu megaproiektu honek?

Aramaioko Udalak, beste behin ere Adifi eskatzen dio behingoan gure udalerrian pendiente dituen lanak amaitzeko eta obra guztiaren errepaso bat egitea gure herriari eta herritarrei segurtasuna bermatuz. Eta Eusko Jaurlaritzari, AHTko obrak hasi aurretik herrian esan zuen bezala, bermatzea gure udalerria jasaten ari den kalte guztiak ahalik eta txikienak izatea".

Mozioa onartu zuten aho batez

Gainera, gogora ekarri dute otsailaren 19ko lur-jausiaren harira Aramaioko Udalbatzak aho batez onartu zuen mozioa:

  • Asteburuko AHTko obretako gertakaria oso larritzat jotzen du, eta ustez amaituta dauden obra batzuetan horrelakoak gertatzea salatzen du.
  • Lehenbailehen gertakari honen arriskuak ebaluatu eta neurriak hartzeko eskatzen dio ADIFi.
  • Azken gertakari honek zuzenean eragiten dion baserriaren egoerari konponbidea ematea exigitzen dio ADIFi.
  • Baserri honetako jabeari egoera argitu eta konpondu artean bere babesa eta laguntza emango dio.
  • Gertakari hau, eta orain dela urte gutxi, AHTko obren ondorioz, jasan genuen bide nagusiaren urte eta pikuko itxiera gogoan izanda, obraren arduraduna den ADIFi gure herriko lurretan dauden AHTko obren berrikuspena eskatzen dio, gure herritarren eta inguruen segurtasuna bermatzea exijituz.

 

 

 

Erlazionatuak

"Urgentziazko lanak" egiteko hainbat lur zati desjabetuko ditu Adifek

Aramaio

AHTko euste horma konpontzeko hainbat lur desjabetuko ditu Adifek. Ekainaren 4an argitaratu zuten iragarkia BOEn; kaltetuek 15 eguneko epea izango ...
AHTrako euste-horma batean lur-jausia gertatu da Untzillan

Aramaio

Bertan dagoen Lugartegi baserriko bizilaguna atzo arratsaldean ohartu zen euste-hormak eusten dituen bere lurretan pitzadurak zeudela. Udaleko ardu...
"AHTko obren berrikuspena" eskatu du Aramaioko Udalak

Aramaio

"Asteburuko AHTko gertakaria oso larritzat jotzen du" Aramaioko Udalak eta "ustez amaituta dauden obra batzuetan horrelakoak gertatzea salatzen du"...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.