Aramaioko Biomasa proiektuak "erantzun positiboa" jaso du Eusko Jaurlaritzaren aldetik

Jokin Bereziartua Lizarazu 2014ko ots. 11a, 16:38

Biomasak basoetako egur baliabideak ditu oinarri.

Aramaion martxan jarri gura den biomasa proiektua dela-eta, Udaleko ordezkariek bilera izan zuten atzo Eusko Jaurlaritzan. Udal ordezkarien arabera, bileraren emaitza "ezin hobea" izan zen, izan ere, Jaurlaritzak konpromisoa hartu du proiektuaren alde egiteko. Proiektuak aurrera egingo balu, Aramaio halako proiektu baten murgiltzen den Estatuko herri bakarra izango litzateke. Izan ere, zenbait eraikin publikoetan erabiltzen da biomasa, baina herri oso batendako energia iturri moduan ez da erabili oraindik.

Oraingoz ez da zehaztu nola gauzatuko den Jaurlaritzaren konpromiso hori, baina "litekeena da" partida bat finkatzea proiektua laguntzeko. Aramaioko alkate Ramon Ajuriak azaldu duenez, interes handia agertu zuten bi ordu eta erdi inguru iraun zuen bileran parte hartu zutenek.

Jaurlaritza, EVE eta HAZI

Atzoko bileran hartu zuten parte Jaurlaritzako Nekazaritza, Arrantza eta Elikagaien Politikako saileko ordezkariak, Energiaren Euskal Erakundeko (EVE) ordezkariak eta HAZI Landa eta Itsas Ingurunearen Garapenerako Jaurlaritzaren Korporazioko kideak.

Auzoz auzo azalpenak ematen

Bestalde, Udala orain ari da 2014ko aurrekontuak auzoz auzo azaltzen. Bada, bilera horiek Biomasa proiektuaren berri emateko ere baliatzen ari dira. Izan ere, proiektuak interes handia piztu du herrian eta Udalak eman dituen aurrerapausoak azaldu dira bilerotan. Udalak apustu handia egin du proiektua aurrera ateratzeko eta azkenaldian egin diren txostenak eta burutu diren bilerak argi eta garbi azaltzen dute proiektua bideragarria dela.