Antzuolako Udalak dirua eta herritarrek eskulana ipinita berritu dute Azaldegietako atsedengunea. Hainbat lan egin dituzte: ingurunea garbitu, zuhaitzak landatu, itxiturak ipini eta mahaiak eta eserlekuak egokitu. Eta behin horiek eginda, leku berritua herritarrei erakustea baino ez zen falta. Horretarako, hain justu, inaugurazio-festa egin zuten domekan, hamaiketakoarekin eta erromeriarekin.
Zazpi kilometroko ibilbidea
Aspaldi bazegoen herrian Azaldegietarako ohitura eta hori berreskuratzea da orain helburua. Bertara kotxez heltzeko aukera egon badagoen arren, oinez igotzera animatzen dituzte herritarrak. Antzuolatik bertatik, Goizperretik gora abiatuta, zazpi kilometro eskas daude.
