Ospakizun Eguna Estala futbol zelaian hasi zuten, beteranoen arteko partiduekin. Futbolari zireneko sasoitik urrun zeuden jokalari asko eta horri bero itogarria gehituz gero, jokalari ohi batek baino gehiagok sufritu egin zuen gozatu baino gehiago...
Ia 400 lagun bazkarian
Gero bai, izerdialdiaren osteko dutxaren ondoren parrandarako gogotsu irten ziren beteranoak eta baita AKEko familia osoa ere. Karropoteo bidez zapatukoa egun gorria zela antzuolar guztiei jakinarazi ostean, eskolako patioa lepo bete zen bazkarirako. Klubeko presidenteak adjektibo zehatza jarri zion eguneko giroari.
Kluba osasuntsu dago gaur egun, garai oso zailak gainditu ostean. "Garai oso txarrak pasa zituen klubak baina aurreko taldeak egindako lan ona sendotu dugu guk, eta ikustea besterik ez dago kluba sasoiko dagoela", dio Gezalagak.
Bazkariaren ostean hainbat sari banatu zituzten, azken denboraldian lan aipagarria egin duten jokalariak errekonozitzeko.
Entrenatzaileen aldaketa, besteak beste
Gezalagak balorazio ona egin zuen amaitu berri den denboraldiaz. Ozta-ozta izan arren gizonezkoen lehen taldeak mailari eutsi izana, infantilek, kadeteek, gazte mailakoek eta nesken taldeak maila ona erakutsi dutela dio. Denboraldi berrira begira lanean daude dagoeneko, besteak beste, talde guztietako entrenatzaileak aldatzeko asmoa dutelako.