Plazan egin zioten azken agurra atzo, zapatua. Omenaldi hunkigarria izan zen. Lutxurdiok eta Kaxetak bertso bana abestu zuten, eta kutxaren gainean pandero bat utzi ostean, Aperribairen ikasle izandakoek kantu batekin agurtu zuten. "Trikitiaren alde lan handia egin du urte askoan Antzuolan. Horregatik guztiagatik, eskerrik asko, Balentin", esan zuten ikasle ohiek. Egubakoitzean hil zen, 85 urte zituela.
Jaiotzez osintxuarra, Lizaso baserrikoa, Balentin Aperribai Larrañaga, Antzuolan bizi izan da txikitatik. Panderoarekin abila zen, eta berak ikasitakoa herriko neska-mutikoei irakatsi gura izan zien. Hala, trikiti eta pandero eskolak eman zituen urte askoan, bere etxean, muxu-truk.
Trikiti Eguneko aitortza
2009an, Antzuolan ospatu zen Debagoieneko V. Trikiti Egunean, aurretik egindako lanaren aitortza jaso zuen. Ekitaldi hartan eskerrak eman zizkien bere irakasle izandakoei, bereziki, Alejandro Gorrizi. Eta, gogora ekarri zuen, panderoarekin eta trikitiarekin hasi aurretik, dultzaina jotzen zuela, eta aldaketa "gogorra" egin zitzaiola.
