Alardearen Batzordeak kaleratu duen oharrak garbi dio alardearen biziraupenaren gakoa egungo gizartera egokitzea dela: "Herri baten kultura-ondarea osatzen dute adierazpen eta ospakizun tradizionalek. Alardeen kasuan, ez dira estatikoak eta aldaezinak; unean uneko gizonek eta emakumeek partekatzen dituzten balioen arabera bila-katu eta aberastu egiten dira. Eta horrela irauten dute mendez mende". Hain zuzen ere, mezu hori zabaltzeko asmoz izan dira Alardearen Elkarteko kideak eta udal ordezkariak Irungo alarde parekidean. "Bertako errealitatea bertatik bertara ikusteko aukera izan genuen. Bertakoekin harremana erein dugu eta helburuak beteta etorri gara", azaldu du Lander Dominguezek, Mairuaren Alardeko buruzagiak. Antzuolarrek garbi dute 2009an Alardea berritu zutenetik gakoa dela hura gizartera egokitzea. Irungo konpartsako kideei ere horixe azaldu zieten. "Irunen ere alarde parekidea izatea denbora kontua dela uste dugu".
Modu naturalean eta gatazka gabe berritu izana txalotu dute Irungo ordezkariek. "Gure alardea nola aberastu den eta aldaketa horren natural eman izana inbidiaz ikusten dute. Guk hilaren 20an etortzeko gonbidapena egin diegu, eta gure kasuan nola izan diren aldaketak kontatzeko prest gaudela helarazi diegu", argitu du Dominguezek.
