Ez bat edo bi. Milaka argazki atera ditu honez gero Santi Mendiolak eta horietako batzuk, 105 zehazki, liburu batean jaso ditu. Oñatik erakusteko asko duela uste du Mendiolak, eta hori adierazi gura izan du aukeratu dituen argazkien bitartez.
Lan nekeza
Hamabi urterekin eskuratu zuen Santi Mendiolak lehen argazki kamera analogikoa eta bere kalkuluen arabera, 30.000 argazki baino gehiago gorde ditu ordutik. Horietatik 105 aukeratu ditu berak Oñati, nere begiradatik izeneko libururako. Ez da lan erraza izan aukeraketa hori egitea, eta agian horregatik, hasieran baztertu egin zuen familiarengandik jasotako ideia. "Eurek, familia artekoek, esan zidaten ea zergatik ez nintzen animatzen argazkiekin liburu bat ateratzen. Hasiera batean ezetz erantzun nien azkar, baina gero, denborarekin, ideiari bueltak eman eta kasu egitea erabaki nuen", azaldu du egileak eguaztenean zinema-aretoan jendaurrean egindako liburuaren aurkezpenean.
Oñatik erakusteko duena
Ekitaldira 50 bat herritar joan ziren eta haiei azaldu zien moduan, "Oñatiko ondarea biltzen duen argazki bilduma bat" da liburua, "Oñatik erakusteko asko" duela baieztatzeko: "Oñatik erakusteko duena jasotzea izan da nire helburua. Plazaratu gura izan ditut Oñatik dituen gauza asko: kaleak, monumentuak, natura, urtaroek eskaintzen dituzten paisaia ezberdinak edo kultura mailan dagoen aberastasuna, esaterako. Corpusak dira horren adibide, baina baita Aratusteak ere, batzuk aipatzearren. Uste dut ikuskizun handia, indartsua, prestatzen dutela Aratusteetan, hori kalean ikusten da, eta asko gustatzen zaidan bizipena da". Mendiolak gehitu duenez, "herriarendako eta herritarrendako" egina dago liburua.
Bat bakarrik analogikoa
Izar Mendiola Igartua ilobak lagundu dio proiektuarekin; berak lagundu dio argazkiekin, maketazioarekin eta inprentarekin.
Liburuak 2005etik hona ateratako argazki sorta bat jasotzen du. Baina 105 argazki horien artean, badago arauak hautsi eta zuri beltzean dagoen bat. Kamera analogikoarekin 1983an ateratako argazki bat, hain zuzen ere. "Kaio oinetako konpontzailea lanean agertzen den argazkia da hori. Bere tailerrera joan eta lanean ari zen bitartean argazkiak ateratzea proposatu nion. Arratsalde baten egon nintzen horretan, eta sorta horretako argazki bat da. Neuri, pertsonalki, asko gustatzen zaidan argazkia da eta liburuan egon behar zela uste nuen. Analogikoan dagoen bakarra da, beste denak digitalak dira".
Salgai liburu dendetan
Astean aurkeztutako Oñati, nere begiradatik liburua eros daiteke dagoeneko. Oraingoz, 150 ale atera dituzte eta Oñatiko liburu dendetan jarri dituzte salgai 30 eurotan.