Donostiako musika hamabostaldia beste urte batez itzuli da Oñatira, Arantzazuko santutegira. Aurtengoa, gainera, ez da edonolako kontzertua izan. Oskorrik agur esan eta hamaika urtetara, Natxo de Felipe eszenatokietara itzuli da Arantzazun, Kuarteto Philiperenarekin batera. Abandonatuak izeneko emanaldia eman dute elkarrekin, goraino betetako santutegiaren aurrean.
Pozik agertu da Bilboko (Bizkaia) abeslaria emanaldiaren ostean, oholtzara urduritasun puntu batekin igo dela aitortu arren: "Ni oso pozik nago. Nerbioengatik galdetzen du jendeak, horrenbeste urtetan eszenatokietan ibili ostean ez dudala nerbiorik izango esanaz. Falta zena! Ni oso urduri atera naiz, eta hirugarren edo laugarren kantuan jendearekin harreman polita zegoela ikusi dudanean lasaitu naiz".
Aita semeak oholtzan daude
Aita semeak tabernan daude kantatzen zuen Oskorrik, baina, kasu honetan aita semeak oholtzan daudela esan daiteke, Xabier de Felipe da eta Kuarteto Philiperenako kideetako bat; Przemyslaw Pujanek, Esther Alba eta Karmele Castillorekin batera. Natxo de Felipek azaldu duenez, Xabier izan da itzulera hau gauzatzeko arrazoietako bat: "Semearen partetik etorri da bereziki, eta niretzat ere, azkenean, gauza polita izan da".
Herdoil gutxiko itzulera
Urte guzti hauetan musikaren mundutik aldenduta egon den arren De Felipe ez da inondik inora herdoildu, eta bertaratu ziren zaleak gozarazi zituen bere kanta eta ahotsarekin. Aspektu horretan, ondo ikusten zela azaldu du bilbotarrak: "Konturatu naiz ez nengoela horren desentrenatuta. Grabaketarako hainbat entsegu egin genituen, eta publikoan kantatu gabe urte asko pasatu ditudan arren ondo sentitzen nintzen".
Arantzazukoa, gainera, ez da izango berriro ere puntuan jartzeko izango duen aukera bakarra, urriaren 4an Bilboko Arriaga antzokian izango da-eta, Abandonatuak emanaldiarekin. Asmoa, dozena erdi emanaldi ematea dela azaldu du, eta "hortik aurrera akabo". Hala ere, emanaldietara joateko aukerarik ez duenak, izango du itzulera honetaz gozatzeko aukera, Abandonatuak izeneko diskoa ere argitaratu dute eta.
Hamabostaldiko antolatzaileak pozik
Hamabostaldiaren bigarren etxe bilakatu da, neurri batean, Arantzazu. Musika hamabostaldiko kudeaketa zuzendari Andoni Alonsok azaldu duenez, Arantzazu leku berezia da, eta bereziago bilakatzen ditu emanaldiak: "Uste dut honek zerbait magikoa duela. Lotura bat sortzen du publikoarekin, naturarekin eta artearekin; hemen duguna arte purua delako. Horrek kontzertu bereziak sortzen laguntzen du".
Urtez urte lepo bete izan da Santutegia musika hamabostaldiak antolatzen dituen kontzertuak ikusteko. Alonso pozik agertu da herritarrek ekimenari egiten dioten harrerarekin: "Pentsa, adibide bat jartzeagatik, gaurko kontzertuan jende gehiago egon da hemen Victoria Eugeniako kontzertu batean baino. Adibide oso sinplea da, baina, oso esanguratsua Arantzazu zer den eta ze botere duen adierazteko". Hurrengo urtean ere Arantzazun izateko borondatea azaldu du Alonsok.
