Oñatiko Zubikoa kiroldegian batu dira Ibon Calvo Ulma Taldeko lehendakaria eta Anton Inza Aloña Mendi kirol elkarteko lehendakaria, hitzarmenaren berri emateko. Hitzarmenak komunitate osoari irekitako ekimenak bultzatzea aurreikusten du eta horretarako diruz zein bestelako baliabideekin gauzatuko da.
Ulma Taldeko lehendakariak adierazi duenez, "akordio honek proiektu gisa garena isaltzen du: Oñatin sakon errotutako eta bere etorkizunarekin konprometitutako erakundea. Kirolaren alde egitea ongizate kolektiboaren, balioetan heztearen eta gure gazteei aukerak eskaintzearen alde egitea da".
Sail guztietarako laguntza
Aloña Mendi kirol elkarteak bere kirol eta gizarte-proiektua indartzen jarraitzeko aukera gisa baloratu du akordioa, udalerriko bizitza funtsezko eragile gisa duen papera sendotuz."Babesletza gizonezkoen futbolera, emakumezkoen eskubaloira eta txirrindularitzara zabaltzeak Aloña Mendi kirol elkartearen papera indartzea ahalbidetuko du, kirola egiteko erreferentziazko gune gisa, baina baita Oñatiko haur eta gazteentzako sozializazio, ikaskuntza eta garapen pertsonaleko ingurumen gisa ere".
Diru-kopuru zehatzik ez
Hitzarmenaren oinarrietako bat dirua bada ere, Ulma Taldetik ez dute kopururik zehaztu nahi izan. Adostasun batera heldu direla adierazi dute alde biek eta ez dute beharrezkoa ikusten diru laguntza kopururik zehaztea.