Behebarrua izenez ezagutzen den gunean egin zuten urteurreneko irekiera ekitaldia Elkar Hezin. Paretetan, besteak beste, lehengo eta gaur egungo argazkiak jarri zituzten eta bertan izan zirenek gustura ikusi zituzten. Ikasleen orlak ere ikusgai zeuden, baita urteotan antolatu dituzten askotariko ekintzen kartelak edota Elkar Heziren kontuak agertzen diren aldizkariak ere. Nola ez, photocall-a ere jarri zuten, askotariko osagarriak jantzi eta bertan argazkiak ateratzeko.
Elkar Heziko hainbat ikasle ohi izan ziren ekitaldian, eta aspaldiko partez zapaldu zuten berriro euren ikastetxe izandakoa. Bertako irakasle izandakoak ere izan ziren ekitaldian eta oroitzapen politak dituztela esan zuten.
Urtean zehar, hainbat ekitaldi
Euskara, kultura eta urte hauetan guztietan lan egin izan duten lan-eremuarekin lotuta, askotariko ekintzak egingo dituzte urtean zehar, 25. urteurrena ospatzeko. Esaterako, martxoaren 8ko Emakumeen Egunaren bueltan, asmoa dute emakume zientzialarien inguruko hitzaldi bat antolatzeko eta bertan parte hartuko dute garai batean ikastetxeko ikasle izan ziren eta gaur egun zientziaren munduan lanean ari diren emakumeak.
