Foru Aldundiko Diputatuen Kontseiluak legealdi hasieran erabaki zuten Gipuzkoa Plazatik, Gipuzkoako Plazetara pasatu nahi zutela eta hala egin dute. Oñatikoa hemeretzigarren batzar ibiltaria izan da. Eider Mendoza Gipuzkoako diputatu nagusiak azaldu elkarlana sustatzeko gogoa eta bordonatea badutela, eta espazio partekatuek hori ahalbidetzen dutela. Ohiko batzarrak desentralizatu eta herritarrengana hurbiltzeko tartea hartzen dute ekimen hauetan, tokiko egoera, kezka eta erronkak gertutik ezagutuz.
Ohiko Kontseiluko batzarraren ostean foru diputatuek, Izaro Elortza, Oñatiko alkatearekin batera Gipuzkoako Artxibo Historikoko instalazioak bisitatu dituzte. Ramon Martin Gipuzoako Artxibo Historikoaren arduraduna izan dute gidari eta bi aldeak oso eskertuta agertu dira; batetik, beraien lana balioan jartzeagatik eta bestetik, egiten duten lanak Gipuzkoako historia denboraren poderioz nola osatu den ezagutzeko balio izan duelako. Eider Mendozak hala azaldu du: "Izan ginen zerbaitengatik eta izaten jarraitu nahi badugu: lanean jarraitu beharra dago. Bidea ezagutzeko, historia ezagutu behar dugu".
Ongizate Plaza Bergaran
Horrez gain, diputatu nagusiak gogora ekarri du aste honetako eguen eta egubakoitzean Ongizate Plaza eramango dela aurrera Bergarako Seminarixuan; ongizate integralari buruz hitz egiteko gune irekia izango da. Egun osoko egitarauak prestatu dituzte eta herritarrak gonbidatzen dituzte komunitatean hausnartzera eta elkarlanean bizitza osoagoa eraikitzera, entzute aktiboa eta konpromiso kolektiboa oinarri hartuta.