Iaz, Txorimaloarena eta Haitzeko Zuloarena ipuin ilustratuak aurkeztu ostean, "pozik" gelditu ziren Lukene Igartua eta Izar Mendiola, eta, horregatik, aurten Mila Bildumara beste bi ipuin gehitzeko erabakia hartu dute. Lukene Igartua aritu da liburua idazteko lanetan eta bere alabak ilustrazioekin lagundu dio, diseinu ikasketak burutu baititu.
Aurkezpenean, harrera beroa jaso dute, senitarteko eta lagun ugari bertaratu dira, eta, aurkezpenaren ostean, liburuak erosi dizkiete.
Iaz hasitako bidea jarraituz
Koloreena eta Torreko Zubiarena dira hain zuzen ipuin berriak. Torreko Zubia iraganetik ekarria, eta, Koloreena, gaurkotasunekoa. Hala ere, Oñatin kokatutako istorioak dira biak, iazko liburuen logika bera jarraituz. Ama-alaben ustez, Mila Bildumak "sendotasuna eta entitatea" hartzen du ipuin hauek gehituz.
Ilustrazioak ere iazko bide beretik jarraitu duela aitortu du Izar Mendiolak: "Aurreko ipuinen estiloa jarraitu behar zutela argi geneukan. Bilduma bat denez, jarraipen koherente bat eduki behar du. Portadan, koloreetan eta testuaren maketazioan ikusi dezakegu estiloaren jarraipen hori". Bi liburuak gehituz, 28 ilustrazio marraztu ditu Mendiolak.
Koloreena libururari dagokionez, bi protagonista nagusi ditu; batetik, Arantzazu, Oñatiko auzo ezaguna, eta, bestetik, Urdin, adimen eta mugikortasun urritasuna duen mutikoa. Azken protagonista hau, Lukeneren semea eta Izarren neba da. "Ipuin honetan eskolako neska-mutiko talde batek Arantzazuko txokoak ezagutuko dituzte koloreen bidez. Koloreak anitzak dira, umeak bezala eta neska-mutikoek aniztasun horri naturaltasunez aurre egiten erakutsiko digute Urdinekin batera", azaldu du Igartuak.
Euskal Herrian zehar hainbat aldaera dituen zubiaren eraikuntzaren ipuina da Torreko Zubiarena, belaunaldiz belaunaldi transmititu dena. "Dolaetxe baserriko sutondoan entzundako ipuin hau kontatzen zigun gure ama Doloresek gu txikiak ginenean", esan du Igartuak. Berari entzundakotik eta 2004-an Jerardo Elortzak Goienkarirako egindako ipuin biduman oinaritu dira liburua osotzeko. "Jerardorekin hitz egitea plazer bat da, berak duen jakituria partekatzeko prest baitago beti", dio Igartuak. "Txorimaloarena gustatu zaien umeei ipuin hau ere gustatuko zaiela uste dut" gehitu du Mendiolak.
Liburuak posible izateko prozesuan laguntza eskaini dietenak eskertzeko ere baliatu dute unea. Besteak beste, Oñatiko Udalaren kultura saila, udal liburutegia, editore lanak egin dituen Marina Etxegoiena, eta zuzentzaile lanetan aritu diren Roberto Altuna eta Joxemari Iturralde eskertu dituzte.
Durangoko azokan eskuragarri
Bi ipuinak Durangoko Azokan izango dira eskuragarri. Autoekoizleen 30. stand-ean egongo dira, eta bertan, ilustrazioekin egindako postalak ere erosi ahalko dira. Bestalde Oñatiko Gabonetako azokan ere egongo dira ama-alabak, abenduaren 21ean, domeka. Ipuin berriak zein zaharrak erosi ahalko dira bertan. Datorren astetik aurrera ere Oñatiko liburu dendetan ere erosi ahalko dira bi ipuinak.
