Denboraldi berria prestatzen dihardu Aloña Mendi futbol taldeak

Julen Murua Mesonero 2025ko abu. 25a, 15:02

Dagoeneko bukatu du denboraldiaurreko lehenengo astea Aloña Mendi futbol taldeak. Iaz Ohorezko Erregionalean maila galdu eta gero, Gorengo mailan jokatuko du aurten talde oñatiarrak. 

Gotzon Urzelairen lekukoa hartu du aulkian Unai Garai oñatiarrak. Aurretik harrobiko taldeetako entrenatzaile eta Aloña Mendiko kirol zuzendari izan ostean, lehen taldeko entrenatzaile kargua hartu du Garaik, eta ilusioz ekin dio denboraldiko lehen asteari. "Poliki-poliki hasi gara. Lehenengo taldeko jokalari denak ez gara bildu, baina talde polita osatu dugu lehenengo aste honetan. Gustura ari gara", adierazi du Garaik.

Talde gaztea izango du aurten Aloña Mendik; izan ere, iaztik hainbat aldaketa izan dituzte. Hala ere, jokalariek duten ilusioa azpimarratu du entrenatzaileak: "Egia da bloke sendo batek utzi duela taldea, eta urteroko kontu berbera da: nahiko talde gaztea dugu, baina gaztetasun horrek indarra eta ilusioa ekartzen du". Taldeko jokalari Iñaki Alonsok ere jokalarien maila nabarmendu du: "Aurpegi guztiz ezberdinak ikusten ditugu taldean, baina entrenamenduetan ikusi da kalitate handiko taldea dela eta gazteak ere gogor datozela".

Ohorezko Erregional mailatik jaitsi berri den taldea den arren, Aloña Mendikoek ez dute epe luzerako helbururik ezarri, eta eguneroko lanari eman nahi diote garrantzi handiena: "Hasierako helburua futbol zelaian elkar ondo ezagutzea da. Horren ostean partiduetan guztia ematea eta emaitza onak lortzea izango da garrantzitsuena. Ikusiko da nola bukatzen dugun denboraldia".

Asteburuan lehen lagunartekoa

Zapatuan, 17:15ean, jokatuko du Aloña Mendik denboraldiaurreko lehenengo lagunartekoa, Azkoagainen, Iru Bat taldearen aurka. Hurrengo lagunartekoak Trebiñu, Ilintxa eta Iurretako taldeen aurka jokatuko dituzte. Ligari dagokionez, irailaren 21eko asteburuan ekingo diote txapelketari Zarautz B taldearen aurka, Asti futbol zelaian.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak