Artxibo irisgarriak. Artxiboak guztiontzat lelopean egunotan egiten ari diren Artxiboen Nazioarteko astearen baitan, Foru Aldundiak antolatuta ate irekiak egin dituzte Oñatin dagoen Gipuzkoako Probintziako Artxibo Historikoan
Aurten, gainera, Gipuzkoa hitzaren jatorria den Ipuskoa hitza lehen aldiz agertu zela mila urte bete direnez, egun bakarrean beharrean bitan zabaldu dituzte artxiboko ateak. Hala, ehun lagun inguruk hartu dute parte bisita gidatuetan.
Askotariko gelak eta lanak
Bisita gidatuetan parte hartu dutenek artxiboko hainbat gune ikusi ahal izan dituzte bertako langileen azalpenak entzunaz; horien artean, baita sargune mugatuko eremuak ere; hala nola gordailuak, lan aretoak eta zaharberritze tailerra. Azken horretan, adibidez, mendetako historia duten dokumentuak nola tratatzen eta konpontzen diren bertatik bertara ikusi dute.
Oñatin gordeta dauden askotariko dokumentuen aukeraketa bat ere erakutsi diete, gainera.
Egoitzako gune berezienak gaur bisitatu ahal izan diren arren, esan Oñatin dagoen Gipuzkoako Probintziako artxibo historikoa eguenro dagoela zabalik herritarrentzat.