Amaia Txintxurretak gidatuta, Kantari iritsi da Oñatira ere. Parte hartu duten talde guztiek zoriz egokitu zaien kanta bat prestatu dute azken asteetan, eta urduritasun guztiak alde batera utzita, bikain ibili dira gaztetxo oñatiarrak. "Oñatiko saioak ere oso ondo doaz. Jendea ikuskizunaz gozatzeko deseatzen dago, eta oso pozik gaude. Umean oholtza gainera ilusioarekin etortzen direla ikusten da, eta hemen behean guraso anai-arreba eta lagunak animatzeko gogoz daude" adierazi du Amaia Txintxurretak.
Amaitu da kantariren bederatzigarren edizioa
Oñatiko emanaldiek eman diete bukaera Kantariren bederatzigarren edizioari. Denboraldia ondo joan dela azaldu du oñatiarrak, eta beste behin ohiko herri guztietan dituztela emanaldiak: "Debagoienean bi urtean behin egiten dugu Kantari ikuskizuna, eta hor pasatu ditugu herri guztiak, Aretxabaleta; Bergara, Arrasate eta Oñati izan da azken geltokia".
Parte hartzaileek maila oso ona erakutsi dutela uste du Txintxurretak; "Irudi berriarekin etorri gara aurten, eta Kantariren K letrak izar bat du atzean. Horrekin Debagoieneko gaztetxoak izar batzuk direla esan nahi izan dugu, eta aurtengoan ere sekulako maila erakutsi dute.
Bi urtez geldik egongo den arren, hamargarren edizio bat egiteko prest agertu da aurkezle oñatiarra, eta gaztetxoak animatu nahi izan ditu etenaldi honetan ere kantuan eta dantzan jarraitzera: "Bi urtean behin egiten dugunez, bitarte honetan jar daitezela kantuan eta dantzan, denbora heltzen denean irekiko dugu berriro parte hartzeko aukera".
