Oñatiko ennea 16 dendako arduraduna da Irma Juaristi (Oñati, 1978), eta aurten lehen aldiz parte hartuko du Euskaraldian, komertzio gisa. Aurrez aritu izan da norbanako gisa, baina, oraingoan, Txanda Oñatiko merkatarien elkartearen bidez animatu da hamaikakoko kide izatera eta ahobizi rola hartzera: "Egunero euskaraz egiten dugu, baina ariketa honek askoz kontzienteago egiten gaitu". Txandatik jaso zuen proposamena, eta ordezkari gisa parte hartzea ohore modura hartu zuen: "Gustura egon ginen, eta zenbait aurpegi ikusteak poza eman zidan; sorpresa atsegina izan zen". Komertzioan harremanak hizkuntzaren bidez eraikitzen dira, eta, haren ustez, ekimen horrek eguneroko xehetasunei arreta jartzen laguntzen du: "Batzuetan, ahaztu egiten ditugu, baina garrantzitsuak dira".
Kontzientziatik, egunerokotasunera
Juaristik dio Oñatin euskara presente sumatzen duela: "Kanpotik datozen asko euskaraz ikasten ari dira, eta hori oso polita dela uste dut. Hala ere, bertakoek ez dugu ahaztu behar guk zaindu behar dugula". Ariketaren helburua zehatz du buruan: "Lehenengo agurra euskaraz izatea; ez da asko eskatzea". Euskara haren ama-hizkuntza da: lagunekin, lanean eta familian beti euskaraz aritu izan da. Aurreiritziak alde batera uztearen garrantziaz ere mintzatu da: "Askotan, ezezagun bati zuzenean gazteleraz egiten diogu; nik hori zuzendu egin dut, eta merezi du".
