Bluesaz gozatzeko aukera berri bat izango dute debagoiendarrek. Izan ere, orain arteko Arrasateko jaialdiari beste bat gehituko zaio: Oñatiko Blues Festibala, apirilaren 25eko eta 26ko asteburuan egingo dena. Egubakoitz eta zapatu gauetan, 21:30ean hasiko dira kontzertuak, gaztetxean eta gaztelekuan, hurrenez hurren.
Oñatiko Blues Elkartea
Oñatiko Blues Elkartea da jaialdiaren antolatzailea. Duela urtebete sortu zuten elkartea eta urri-azaroan ekin zioten jaialdiari forma emateari. Aker tabernan egin izan dituzte saio batzuk aurretik, baina hilaren 25erako eta 26rako antolatutako formatuan lehen aldia izango da; errealitate bihurtutako ametsa dela diote. 106 bazkide dira egun elkartean.
Amerikako Estatu Batuetako hegoaldeko komunitate afro-amerikarretan sortutako musika-generoa munduan zehar hedatu da: Europan eta espainiar estatuan badira taldeak, baita Euskal Herrian ere, eta berriak sortzen ari dira, gainera. Jaialdiei dagokienez ere, bada mugimendua.
Sarrerak erosteko
Sarrerak kontzertu gauetan hartu ahalko dira, gaztetxean eta gaztelekuan bertan –12 eurotan–; eta zapatukoak aurrez ere eskuratu ahalko dira –10 eurotan– udalaren aurre-salmentarako webgunean. Jaialdiaren asteburuan, gainera, tabernei blues-a ipintzeko gonbidapena luzatuko diete, kontzertuetarako giroa prestatzen joateko eta musika estilo hori ezagutzen ez dutenei horretarako aukera emateko.
