Ariketa fisiko geroz eta gehiago egiteko joera dago gaur egun, eta, azkenaldian, Zubikoa kiroldegiko gimnasiora geroz eta erabiltzaile gehiago joaten direnez, material berria jarri dute.
Batetik, geroz eta gehiago erabiltzen den indar-ariketen gunean gomazko lurra jarri dute, eta bestetik, hiru makina berri ekarri dituzte; ibiltzeko edota korrika egiteko zinta bat eta hanketan indarra lantzeko bi makina. Horiez gain, asmoa da epe motzera beste zinta bat, eliptika bat eta bizkarralderik ez duten bi bizikleta gehitzeko.
Arratsaldeetan jende gehien
Gimnasioko monitore Mikel Aramendiaren arabera, erabiltzaile gehien arratsaldeetan izaten dira: "Arratsaldeko seietatik zazpietara, astelehenetan, martitzenetan… gimnasioan aldi berean 70 pertsona egotea ohikoena da; egun batzuetan ia 80 pertsonaren bueltan egon gara. Goizetan desberdina da, 30-40 pertsona inguru egoten gara, baina garrantzi handia dute indar-ariketek gaur egun osasunean, eta ez da notizia txarra erabiltzaile kopuru horiek hemen biltzea egunero", adierazi du.
Ikastaroak bihar
Makinak okupatuta daudenetan erabiltzaileak zain geldi egon ez daitezen, materialik behar ez duten ariketa funtzionalen ordubeteko ikastaroak antolatu dituzte biharko, zapatua, 09:30ean hasita. Bertan parte hartzeko izena eman behar da kiroldegian, eta, hasieran bi txanda egitea aurreikusten zuten arren, izena eman duten erabiltzaile kopurua ikusita, beste txanda bat ere sortu behar izan dute: "Ikusten dut jende asko itxaroten makinak noiz libratu zain; beraz, irakatsiko dut inongo material barik indar-ariketak egin daitezkeela", azaldu du Aramendiak. 09:30ean izango da ikastaroaren lehen txanda, 10:45ean bigarrena eta 12:00etan azkena.
Bestelako saio batzuk ere bai
Bestelako ikastaro batzuk ere izan dituzte gimnasioan azken hilabetetan. Esaterako, goma elastikoaren tailerra egin zuten, gimnasioa geroz eta pertsona nagusiagoak erabiltzen ere badabiltzalako, eta, bidaiatzen dutenean motxilan edo maletan sartzeko erraza denez, indar-entrenamenduak irakatsi zituen Aramendiak goma elastikoarekin. Urtarrilean, gimnasioko makinak nola erabili ikasteko tailerra ere eman zuen.
16 urtetik hasi eta 80 baino gehiagoko pertsonak ere joaten dira gimnasiora, eta Udalak 15.000 euroko inbertsioa egin du.
