2015. urtean sortu zen Itsas Salbamendu Humanitarioa erakundea, Siriako gerratearen ondorioz. Arriaran, baina, bi urte geroago hasi zen erakundean laguntzen, gaur arte. Egun, beste hainbat proiektutan murgilduta dago Arriaran; esaterako Nikaraguan eta Ekuadorren tratu txarrak jasotzen dituzten emakumeen etxeei laguntzen edota Ugandako kanpamenduetako egoera ezagutu eta eurei ere laguntza eskaintzen. Horren harira, Arriaranek dio Goienagusik antolatutako bezalako hitzaldiak egitea "oso garrantzitsua" dela gizarte sentsibilizazioa garatzeko.
Albiste izan da azken astean Itsas Salbamendu Humanitarioa; izan ere, erakundeak demanda bat aurkeztu du Burrianako Udaleko VOXeko zinegotzi eta Valentziako Parlamentuko diputatu Jesús Albiolek atzera egin eta Aita Mariren aurkako akusazioak zuzen ditzan. Horren harira, Arriaranek adierazi du salatzen dituztela "jendearekin negozioa egitea leporatuta. Hori da betiko beraien arma. Salaketa jarri da baina, badakizue, eskuina beti dago gainean hasiera-hasieratik. Ikusiko da zertan geratzen den guztia".
