Egun seinalatua da uztailaren 31 Gipuzkoan, eta horrenbestez Debagoienean. San Inazio eguna ospatzen da egun horretan, Gipuzkoako patroiaren eguna. Ohiturak agindu legez, ugariak izan ziren eguna Urbian ospatzea erabaki zuten herritarrak. Beroari, nekeari eta izerdiari aurre egitea zail izan zen arren, giro paregabea egon zen egun osoan zehar.
Lepo bete ziren Urbiako fonda eta honen inguruak. Pozik agertu zen Peio Bilbao, fondako arduraduna, egunak emandakoarekin: "Bertako artzainentzat egun handia da eta fondarentzako ere bai. Urteko egun fuerteena da, eta lan egiteko eguna da".
Egitarau oparoa
Eguna mendian ospatzeak zailtasunak ekarri arren, egitarau osoa antolatu zuten eguna ospatzeko. Mezarekin hasi zuten San Inazio eguna, eta ondoren beste hainbat ekintzaz gozatzeko aukera izan zuten bertaratu zirenek. Artzai txakur lehiaketa izan zen horietako bat. Bertan, Fidel Alonso aretarra izan zen irabazle, Lis txakurrarekin batera. "Azkenean etxetik goizeko zortzietan irten behar izan dugu. Hona iristeko bi ordu ditugu eta gauzak irten diren bezala irtetzea, egon den giroarekin, oso pozgarria da" azaldu zuen Alonsok.
Erromeria ere izan zen lepo betetako fondaren ondoan. Miren, Agur eta Oier ordu luzez jardun ziren beroari gain hartuz jendea dantzan jatzen. Urte luzez izan dira Urbian jotzen, baina hala ere, hunkituta agertu zen Agurtzane Mujika bertan jotzeko aukera izateagatik: "Opari handi bat da. Aspaldi hasi ginen hemen jotzen, duela 15 urte edo. Urte batzuk etorri gabe egon gara, baina opari handi bat da hemen izatea". Bertsolariak ere baziren, han eta hemen, saio ezberdinak eginaz, formalak zein lagun artekoak.
