Oñatiko bilkuran harro azaldu dira pentsiodunak "bidezkoa den aberastasunaren banaketaren aldeko borrokan" hartu duten tokiagatik: "Duela sei urte pentsiodunak eta adineko jendea guztiz baztertutako taldea ginen, eta sei urte hauetan lortu dugu agenda politikoan egotea, albistetan agertzea, gure aldarrikapenez hitz egitea eta haiek aztertu eta onartuak izatea", azaldu du Josefe Diaz de Tuestak.
Lortutakoak eta lortzeko daudenak
Hainbat dira pentsiodunen mugimenduak urte hauetan lortutakoak, besteak beste, 2013ko Alderdi Popularraren erreformak proposatzen zuen pentsioen %0,25eko igoera hura indargabetzea, pentsiodunak kalera ateratzera bultzatu zuen erabakia, alegia. Baina gehiago ere izan dira: "Lortu dugu, besteak beste, KPIaren igoera pentsioei urtero aplikatzea edo alargunen pentsioa asko hobetzea. Halere, badago zer lortu, nagusiki, aspaldian aipatzen dugun 1.080 euroko gutxieneko pentsioa lortzea eta hori bezain inportantea, genero arrakala gainditzea".
