Azkoitiko Udalak egindakotik hartu dute ideia, eta, egokitzapen eta moldaketa lanetan ibilli ondoren, aurkeztu dute hiztegi txikia: 'Esaiozu euskeraz'. 44 orrialde ditu, eta 21 ataletan banatuta dago: etxeari lotutako hitzak, kalekoak, gorputz atalak, hilabeteen izenak, zenbakiak, koloreak, komunikatzeko esaldi laburrak... Oñatiko euskaran daude idatzita, belarritik sartzen diren moduan. Euskaltegian zaintza arloan dihardutenei zuzendutako euskara ikastaroak egin dira azken urteetan, eta horietan aritu diren hainbat ikaslek horrelako material baten beharra zutela ikusita hasi ziren hiztegitxoa lantzen. Elkarlanean, eurekin batera jaso dituzte hiztegian datozen esaldiak, egoerak eta hitzak.
Mila ale atera dituzte eta zaintza munduan lanean ari direnen artean banatuko dituzte. Herritarrek ere aukera izango dute esku artean izateko. Online kontsulta daiteke udal webgunean eta Durangoko Azokan ere salgai egongo da Badiharduguren postuan.
