Arantzazuko Ama Birjinaren eguna, Gipuzkoako zaindariaren eguna, da gaur; eguna ospatzeko, erakundeetako ordezkaritza zabala elkartu da Arantzazun. Eider Mendoza Diputatu nagusiak, Oñatiko alkate Izaro Elorzak, Eusko Legebiltzarreko presidente Bakartxo Tejeriak eta Gipuzkoako Batzar Nagusiko buru Xabier Ezeizabarrenak egin diote harrera Iñigo Urkullu lehendakariari. Elkarrekin egin dute Arantzazuko santutegi aurrealdera arteko bidea; han, gainontzeko zinegotziak, diputatuak eta sailburuak zeuden euren zain. Oñatz dantza taldeko dantzariek aurreskua dantzatu dute eta gero elizara sartu dira erakundeetako ordezkarietako batzuk.
Erromesaldia
Arantzazurako erromesaldia 07:00etan irten da San Migel parrokiatik; gutxi izan dira lehenengo zati hori erromesaldian egin dutenak. Bigarren hitzordua zapatan izan dute; han, 100 bat lagun batu dira erromesaldira. Horiez gain, gaurkoan eguraldiak lagundu duenez, asko izan dira oinez Arantzazura igo diren herritarrak.
Bikarioaren hitzak
Arantzazuko Amaren eguneko meza nagusia Mikel Aranguren bikarioak zuzendu du. "Gizatasuna" izan du hizpide, eta elkarri laguntzearen beharra nabarmendu du. Gainera, gogoan izan du bart Marokon izandako lurrikararen ondorioz kaltetuak.
Musika Bandaren kontzertua
Oñatiko Musika Bandak kontzertua egin du Santutegiaren aurrealdean. Arantzazuko Ama Birjinaren ereserkiarekin hasi dute kontzertua. Gaur, zapatua izanda, ohi baino herritar gehiago joan dira Arantzazura. Oñatitik bakarrik ez, Gipuzkoako osotik etorritako erromesak izan dira gaur Arantzazun.
