Goizeko 09:00etan abiatu dira ehundaka lagun, Oñatiko Soraluze Hotela jatetxearen aurretik Arantzazurako erromesaldian 'Munduaren zauriak, Kristoren zauri' lelopean. Ohitura duten legez parte hartzaileek ebanjelioko pasarteak eta gogoetak entzun dituzte bidean. Donostiako Elizbarrutiak antolatutako martxan, Unai Manterola bikarioa aritu da antolatzaile lanetan eta berak azaldu duenez, zazpi pauso egingo dituzte, eta bakoitzean hausnarketa gai ezberdina planteatuko dute: "Aurten, zazpi gaiak Kristoren zaurien inguruan dira; hala nola, munduaren zaintza, emakumeen aurkako indarkeria, elizaren botere abusua, elkartasun beharra... Horrelako zazpi gai izango dira; munduaren zauriak aipatzen dituena eta munduaren zauri horiek Kristoren zauriak dira".
Aurtengoan, Gipuzkoako gotzain Fernando Pradok ere hartu du parte. Gotzain bezala, lehen aldiz egingo du erromesaldia, baina adierazi duenez, duela 24 urteko martxan ere izan zen. Jendearekin egoteaz "pozik" dagoela aitortu du: "Egun zoragarri bat pasako dugu elkarrekin. Hori da helburua eta hemen gaude". Ekintzaren helburua hausnarketa egitea dio; hori bai, festa giroan: "Garizuman gaude eta bihar Aste Santuan sartuko gara. Hausnarketa moduan prestatzen dugu egun honetarako".
Hernani, Oiartzun, Villabona, Azkoitia... Gipuzkoako hainbat txokotatik etorri dira fededunak. Gustura, baina nabaritu dute partaide kopurua jaitsi dela. "Hemen gaudenak, gehienak fededunak gara eta poz handiz etortzen gara Arantzazuko amaren babesean. Badakigu gure gizartean fedearen kontua beherantz doala, baina guk kemena mantentzen dugu eta aurrera goaz", dio gotzainak beherakada horren inguruan.
Mezaren ordez, otoitza
Erromesaldiaren lehen urteetan ez zen meza nagusirik egoten, eta gaurkoan "era hori berreskuratu" dute Manterolaren esanetan. Hortaz, ez da meza nagusirik egongo. Erromesak eguerdiko hamabiak aldera iritsi dira Arantzazuko Santutegira eta otoitza egin dute Basilika bertan. Manterolaren hitzetan, "tarte gutxi geratzen zen elkarrizketarako, elkarrekin egoteko, urtean behin ikusten den jendea agurtzeko... Horrek martxaren zati izaten jarraitzen du. Bi ordu otoitz egiten igo ondoren, nahikoa dela iruditzen zaigu eta Eukaristiara joateko aukera du jendean gaur arratsaldean edo bihar goizean parrokia guztietan".