Lehenengo zatian Andoni Ezkurraren neskek ondo eutsi diote Realari –Josu Diaz bergararra da talde horretako bigarren entrenatzailea–. Lehenengo 15 minutuetan txuri-urdinak ez dira gehiago izan, eta parean egon dira indarrak. Poliki-poliki, baina, Reala bere nagusitasuna ezartzen joan da: zelaian hobeto kokatuz, eta baloia hobeto mugituz. Horri esker, Realeko ordezkariek birritan zulatu dute Leintz Arizmendikoen atea (0-2). Bigarren zatian gehiago nabarmendu da bi taldeen artean dagoen aldea, eta bereziki alde fisikoan igarri da. Baloiaren atzetik korrika ibili dira etxekoak, eta hori nekagarria da. Lore Etxeandia zen etxekoen erreferentzia aurrean, baina Aretxabaletakoa bakarrik zegoen. Orduan etorri dira Realekoen gainontzeko hiru golak, eta etxekoek ohorezko gola ere egin ahal izan dute.
Jende asko Azkoagainen
Partiduak jende asko erakarri du Azkoagaingo harmailetara. Batetik, Leintz Arizmendin oñatiar mordoa dagoelako, baina baita Realak dituen bi debagoiendarrak ere bertakoak direlako: Maren Arabaolaza eta Ane Isasisamendi. Isasisasmendik –taldeko kapitaina– partidu txukuna egin du, eta baita gola egin ere. Arabaolazak min hartu du aste barruan entrenatzen zebilela –giharretako haustura–, eta hiru aste beharko ditu errekuperatzeko; zoritxarrez, harmailetan jarraitu behar izan du partidua. Partiduko albiste txarrena, baina, Nahia Zamorak eman du. Bigarren zatian irten den Realeko jokalariak bertan behera utzi behar izan du partidua, belaunean min hartu eta gero. Zuzenean eraman dute ospitalera.
Gizonezkoen ohorezko erregionalean, garaipenik ez
Partidurik irabazi ezinka jarraitzen dute Bergarak, Mondrak eta Aretxabaletak. Eta oraingo asteburuan Aloña Mendik ere ez du irabazi. Mondrak 4-1 galzu zuen zapatuan Zumaiaren zelaian, eta Bergarak 1-1 egin zuen Oiartzunen. Aloña Mendik ere puntu bakarra (1-1) batu zuen Tolosan, eta gaur Aretxabaletak ere berdindu egin du etxean (2-2), Zarautzen kontra.
