Euskal Herriko Bilgune Feministaren 20 urteko ibilbidea ospatu nahi izan dute, eta horretarako, Oñati hautatu dute. Bi urteren ostean, gogotsu itzuli dira, egitaraua indartuta. Denerako egon da lekua, eta jaiak, hausnarketak, gozamena eta borroka uztartu dituzte. Naia Torrealdai Bilgune Feministako kidearen hitzetan, "ilusio handiz heldu gara kaleak hartzeko eta indarrak biltzeko".
Zapatu goizean hasi ziren mahai inguru ibiltariarekin, eta arratsaldean ere tailerretan, mahai inguruetan eta bestelako ekintzetan parte hartzeko aukera egon zen. Gau aldera, kontzertua eta jai giroa izan zen nagusi.
Torrealdaik adierazi duenez, balorazioak egiteko "goiz" da, baina atera duten ondorioetako bat da mugimendu feministako kideak "gogoz daudela kaleak hartzeko, elkartzeko, gure proposamenak publiko egiteko eta interpelaziorako, Euskal Herria feminista hori eraikitzeko berriro". Proposamen horiez galdetuta, esaterako, indarkeria matxistaren aurkako eta zaintza sistema publiko komunitarioaren aldeko proposamenak dituztela adierazi du: "Oraindik asko dago egiteko, bai kalean, bai komunitatean, baita instituzioetan ere".
Euskal Herriko txoko ezberdinetatik etorri dira Oñatiko topaketara. Bertaratu direnak "gustura" agertu dira; "halako lekuak beharrezkoa direla" gaineratu dute.
Etorkizunera begira, hauxe dio antolakuntza taldeko Elene Lopetegik: "Espero dezagun beste hogei urte edo gehiago betetzea. Hemendik aurrera eguneroko lanarekin jarraituko dugu, orain arte egin dugun bezala; antolakuntza eta borrokaren bitartez, Bilgune Feminista bultzatzen eta indarra ematen".
