Oñatiko Chernobilen Lagunak elkarteko kideek ez galkorrak diren askotariko produktuak jaso dituzte Martzelino Zelaia kaleko lokalean: jatekoak, osasunerako gaiak, umeen elikadurarako eta egunerokotasunerako produktuak, olioa, esnea, musukoak, bendak eta ur oxigenatua, besteak beste.
Oñatira etortzen diren ume ukrainarrak Kiev iparraldean dagoen Ivankiv herrikoak dira, eta asteburuan jasotako material guztia hara bidali gura dute. Badute esperantza helmugara iritsiko dena.
Orain arte eskuak lotuta izan dituzte. Edozein laguntza bere helmugara iritsiko ote zen ziurgabetasuna edukita, bidalketak atzeratu behar izan dituzte. Eguaztenean Oñatitik irtengo den materiala Ivankivera heltzen bada, badituzte beste laguntza proiektu batzuk buruan.
Eta, hain justu ere, halako ekintzak baliatzen dituzte, barruko urduritasuna eta antsietatea askatzeko. Askok ez dute beraien umearekin inongo kontaktu zuzenik.
