"Ez gara etxera joan eta ez dugu joateko asmorik ere", adierazi dute Antixenako egunerokoa kudeatzen duten gazteek. 2020an jarri dute fokua, "gazteontzat eta gaztetxeentzat urte zaila izan zela" azpimarratuz. Aurtengo ideia orokorra iazko "kriminalizazio, debeku, mehatxu eta etengabeko jarraipen polizialari buelta ematea" izan dela aipatu dute. Oztopoak oztopo, "inoiz baino gazte gehiagoren konpromisoaz" aurrera egin dutela diote: "Hileroko egitaraua, gazte mugimendua, mobilizazioak, auzolanak, eskaintza kulturala zein bestelako dozenaka ekintzekin".
Korrika eguna gogoan
2021eko martxoaren 27an Korrika eguneko egitaraua Ertzaintzak zapuztu zuela ekarri dute gogora, baita erasoari apirilaren 10ean Herriko Plaza betez erantzun ziotela ere. Euskal Herriko gune autogestionatu guztiei babesa adierazi diete, bereziki Errotxapeako gaztetxeari.
Keinu egin diote, era berean, etorkizunari: "Aurten bederatzi, hurrengo urtean hamar, ez al dira gutxi samar?".
Egun osoko egitaraua
Kantu bazkariarekin egingo dute otordua, eta presoak oroituko dituzte arratsaldean, 18:30etik aurrera, poteo girotuarekin. 21:30etan hasita, Nikotina, Larru Beltzak eta DJ Bakallaua Saltzan igoko dira Antixenako oholtzara, gauari musika eta giroa jartzeko.