Alkateen Klima eta Energia Itunaren baitan dago Oñati. Duela 100 urte, uraren indarrak eraman zuen energia Oñatira, eta Jaurlaritzak azaldu duenez, horri esker, hondakinen gaikako bilketak, eraikinetako eta argiteria publikoko energia-efizientziak eta lanerako joan-etorrietarako modu jasangarrienek ahalbidetu ditu Udalak. Hain zuzen ere, horiek izan dira 2020rako ezarritako helburuak. Etorkizunerako, berriz, beste hau da erronka: neutraltasun klimatikoa lortzea.
Oñatiz gain, beste 20 herrik egiten dute bat Itunarekin (ia 1,7 milioi pertsona batzen ditu horrek), eta Tapia sailburuak esan duenez, toki-eremutik klima-aldaketaren eta energia-trantsizioaren erronkan ari dira lanean. "2050. urtean isuriei dagokienez lurralde erresiliente eta neutro batera iristea da asmoa", gehitu du.
Europako itun berdearekin bat
Glasgown egingo den Nazio Batuen Klimaren Goi-bileran parte hartuko du erkidegoak, eta sailburuak adierazi duenez, "garrantzi handia" izango du: "Parisko Goi-bileraz geroztik garrantzitsuena izango da. 2015ean hartutako konpromisoak berrikusteko eta helburu berriak ezartzeko balioko du".
Bestetik, EAEra etorrita, etorkizuneko isuriak murrizteko eta energia berriztagarria sortzeko eredua sortu nahi dutela azaldu du Tapiak: "Europako Itun Berdearekin bat egin nahi izan dugu, eta gure Basque Green Deal propioa diseinatu ere bai".