Antolatzaileen esanetan, era horretako hondakinak gure herrietan sortzen ditugunen ia erdia direla kontuan hartuta, hobekuntzak egin ahal izateko egoera aztertu eta esperientziak trukatzeko erabili gura izan dute gaurko jardunaldia. Eta horretarako, hiru eredu ezberdinen berri izan dute parte hartzaileek: Aduna herrikoa, Galiziako Pontevedra probintziakoa eta Austriakoa.
Gaian aditua den Joseba Sanchez Arizmendiarrietak ere hartu du parte gaurko jardunaldian, biohondakinen kudeaketarekin Euskal Herriko egoera zein den azalduaz. Azpimarratu du sistema asko eta askotarikoak erabiltzen direla, eta ondorioz, Europak ezarritako helburuak gertuago edo urrunago daudela lurraldeen arabera.
Gaurko jardunaldia aurrez aurre eta online jarraitzeko aukera egon da, eta antolatzaileak gustura agertu dira erantzunarekin, Euskal Herriko osoko udal eta erakundeetako parte-hartzaileak izan dituelako, herri handi eta txikietakoak.