"Haritz amerikarrak dira botaten ari garenak. Ezagutzen dira sustrai ahulak dituztelako, eta erortzeko samurtasuna dute. Beraz, eskolaren alboan segurtasuna bermatzeko ari gara ingurua txukuntzen", adierazi du Asier Iraeta Oñatiko Ingurumen zinegotziak.
Natur Eskola ondoko zuhaitz handienak botatzen ari dira, eta lan horietan, Tomas Sagasti ari da, Oñatiko Udalak eskatuta. Zuhaitzak, eskola aldera okertuta daude eta lehenago edo beranduago erortzeko arriskua dagoelako botako dituzte.
Aldakiñoko bidexka itxita
Lanak amaitu bitartean, Olakua eta San Martin auzoak lotzen dituen Aldakiñoko bidexka, Natur eskolaren bueltako ingurua itxita egongo da. Aurreikuspenen arabera eguenerako zabalik egongo den arren, gaur eta bihar 07:30etatik 18:00ak bitartean itxita egongo da bidea.
Natur Eskolako eraikineko azken lanak
Natur eskolako lanei dagokienez, bestalde, datozen asteetan beste zenbait lan egingo dituztela adierazi du Asier Iraeta, Oñatiko ingurumen zinegotziak. "Eskola barruko lanetan, tximinia otsailean egingo da; su-egurrarekin aritzen dena, eta efizentzia altukoa dena. Eta gero, komunak kolokatzea, ateren bat edo beste jartzea… geratuko litzake, datozen astean jarriko ditugu. Azkenik, kanpoaldeko urbanizazioa geratuko litzake".
Natur eskola barruko zein kanpoandeko lan guztiak amaitzen dituztenean, inaugurazioa egitea ere badutela aurreikusita adierazi du Iraetak, data zehazteko dutela gaineratuz.