Arantzazuko Ama Birjinaren Egunak ez ohiko irudia utzi digu gaur. Jende gutxiago eta ekitaldi edo harrera ofizialik ez, nahiz eta erakundetako ordezkariak bertaratu diren. Oñatiarren oinezkoen erromesaldirik ere ez da egon, hala ere, askok, ohiturari eutsiz oinez egin duten harako bidea. Gaurko egunez Oñatiko Bandak Arantzazun egiten duen kontzertuak ere huts egin du. Hala ere, meza nagusian ia 400 pertsona elkartu dira. Gainera, gaur ospakizunak bazuen balio erantsi bat Ama Birjinaren Egunean jarri baitzen egungo santutegiaren lehen harria.
Harrera ofizialik ez zaie egin aurten erakundeetako ordezkariei, hala ere, bertan izan dira, besteak beste, Oñatiko udalbatzako zinegotzi jeltzaleak, Eusko Legebiltzarreko presidente Bakartxo Tejeria eta Markel Olano diputatu nagusia.
Azken ordukoa ere izan da, Jose Ignacio Munilla Donostiako gotzaina baitzen etortzekoa meza ematera. Munillak, baina, ezin izan du etorri eta haren ordez, Unai Manterolak zuzendu du meza.
