Eta Arantzazuko Ama Birjinaren bederatziurrena berezia izango bada, antzerakoa izango da eguna bera: irailaren 9a. Meza nagusiaren aurretik politikoei egiten zaien ongietorria eta agurra, eta elizkizunaren ostean Oñatiko musika bandak egiten duen kontzertua ez dira aurten egingo. Elizkizun nagusia bakarrik mantenduko da, eta hori ere, edukiera mugatuarekin.
Basilikan sartzeko sarrera-txartela beharko da. Horiek jaso daitezke Arantzazuko dendan edo Oñatiko Txokolaitexan. Basilikan 1.500 lagun sartzen dira, baina irailaren 9an, 500 lagunendako lekua egongo da.
Erromesaldia, bertan behera
Herritar asko dira, bereziki oñatiarrak, irailaren 9an Arantzazura oinez igotzen direnak. Batzuk beraien kontura joaten dira, baina, beste hainbatek erromesaldian parte hartzen dute. Oñati-Arantzazu bidea egiten dute otoitzean. Bada, erromesaldi hori bertan behera utzi dute, distantzia neurria bermatu ezin direlako.