Udalak ohar bidez adierazi du, aipatutako bileretan herriko hainbat eragilek hartu dutela parte, haurren eta nagusien danborradak, nekarazi elkarteak eta txosna batzordeak, besteak beste, eta jaietan egingarri diren hainbat jarduera identifikatu direla, zeintzuek uneoro legeak ezarritako segurtasun-neurriak eta protokoloak bermatuta izango dituzten: "Unean uneko dekretuari jarraituz, sortzaileen, antolatzaileen eta herritarren segurtasuna bermatuko da, eta antolatutako ekintza guztietarako idatziko da protokolo-txostena".
Gauzak horrela, Udalak hurrengo bileraren berri eman du oharrean: "Hurrengo bilera irekia irailaren 8an izango da, arratsaldeko 18:00etan, kultur Etxeko Zinema Aretoan. Helburua izango da aurreko bileretan zehaztu eta adostutakoa aintzat hartuta Udalak proposamen bat aurkeztea eta denon artean proposamen hori aztertzea eta adostea".
Kultur eta sormen-jarduerak bultzatzea
Udalak, "jaiak" kontzeptuaren bigarren esanahia azpimarratu du, kultur eta sormen-jarduerak bultzatzeko eta bideratzeko garaia dela adieraziz. Horren harira, aurten jaietako egitarauaren liburuxkarik egongo ez dela aitortu du Udalak eta antolatzen diren ekitaldiak beste euskarri batzuen berri emango direla jakinarazi du.
Horrekin batera, Udalak "herritarrek kultur eskaintza" izatearen nahia azaldu du, "berme guztiekin eta beharrezko diren segurtasun-neurri guztiak hartuta". Horregatik, ekitaldien kontratazioak eta egitaraua irailean lotuko dituzte.