Duela 50 urte hasi ziren Euskal Udalekuak antolatzen. Ordutik, urtero, uztailean eta abuztuan, hamaika txanda egiten dituzte udalekuetako hiru egoitzetan: Goñin, Bernedon eta Abaigarren. Aurtengoak ere gertu dituzte. Oñatiko gaztetxean egindako egonaldian, Euskal Herriko ikastetxe guztietara helduko diren informazio orriak sartu dituzten gutun-azaletan. "Martxoaren 2an zabalduko dugu izen-ematea. Urtero 1.000 ume inguru hartzen ditugu hiru etxeetan. Gehienak, errepikatzaileak dira. Alegia, urtero joaten dira Euskal Udalekuetara", esan du Udalekuetako begirale Vir Gomezek.
Hausnarketarako topaketa
Egun osoko egonaldia egin dute Oñatin. Euskal Udalekuen gaineko hausnarketa egin dute, proiektuak bizirik irauteko beharrezkoak diren aldaketei buruz egin dute berba, eta beraien artean elkar ezagutzeko baliatu dute. Bazkaria, karaokea, kantaldia eta Yogurina Borovaren kontzertua izan dira beste ekitaldietako batzuk.
