Natrako langileen aldarrikapenak
Sei dira Natrako langileek enpresari eskatzen dioten baldintzak: errelebo kontratua gauzatzea, laugarren erreleboko plusa hobetzea, antzinatasunaren araberako kategorien igoera, behin-behineko langileen egoera hobetzea, ultraaktibitate mugagabea eta KPIaren gaineko soldata igoera.
Hitzarmeneko "puntu atzerakoiak"
ELAk adierazi duenez, enpresak hitzarmenean "puntu atzerakoiak" sartzeko proposamena egin du, horrek langileek dagoeneko dituzten "eskubideen galera" suposatuko lukeelarik. Horrez gain, sindikatuak "genero desberdintasuna" salatu du, industriako sektorea "oso maskulinizatua" dagoela esanez.
Grebaren jarraipena
ELAren esanetan "greba jarraipen osoa izaten ari da", baina adierazi du, enpresaren "jarrera gogorra" salatzen jarraitu behar dutela. Horrekin batera, jakinarazi du, enpresak mantenu zerbitzu minimoak eskatu dituela.
Txokolate jana
Natrako langileek enpresarekin duen gatazka "sozializatzeko" asmoz, eguenean, hilaren 12an, txokolate jana izango da herriko plazan, 18:00etatik aurrera. Horrez gain, 19:00etan elkarretaratzea egingo dute.
Enpresaren erantzuna
Gaiaren inguruan enpresari galdetuta, Natratik erantzun dute negoziazio mahaia bat dagoela eta hor ari direla lantzen eta landuko dituztela lan hitzarmenaren gaia eta horren inguruko puntuak. Besterik ez dutela esaterik adierazi dute, erabakiak adosteko tokia negoziazio mahaia dela.