Magia mikologikoa hizpide
Gaurkoa, ez da Frailek Arantzazun ematen zuen lehen hitzaldia. Izan ere, iaz ere onddoen inguruan hitz egiteko gonbidapena helarazi zioten Parketxetik eta aurtengo gonbidapena ere onartu egin du: "Oso interesgarria iruditzen zait horrelako ekimenak antolatzea eta oso gustura etortzen naiz". Aurten baina, diskurtso ezberdin bat izan du Frailek, magia mikologikoa, alegia. Bertan, onddoei buruz ezagutzen ez direnak eman ditu jakitera eta besteak beste, onddoen edabeak egiteko azalpenak eman dizkie bertaratutako herritarrei.
Mikopoteoa
Hitzaldiaren ostean, Mikopoteoa hasi da Hotel Santuario de Arantzazu, Goiko-Benta, Milikua, Sindika eta Zelai-Zabalen. Eguraldia ez da lagun izan, baina herritar ugari igo dira Arantzazura pintxoez gozatzera. Gainera, aurten, udalak antolakuntzarekin kolaboratzeko asmotan, autobusa antolatu du herritarrak igotzeko eta jaisteko. Herritarren artean gainera, jatetxetako pintxoek harrera ona izan dute eta oso esperientzia gomendagarria dela adierazi dute askok.