Hitzarmen honi lotuta, gizarteratze eta laneratze prozesuetatik datozen pertsonak kontratatzeko dirulaguntza deialdia egingo du Udalak. Bidebarritik datozen langileak kontratatzen dituzten Oñatiko 50 langiletik beherako enpresek jaso ahalko dute dirulaguntza. 20.000 euro izango dira laguntzetan banatzeko, Udalak eta Ulma Fundazioak erdibana jarritakoak. Ulmak, horrez gain, Bidebarritik datozen langileak bere kooperatibetan kontratatuz ere egingo du ekarpena.
Gehienez hiru urte egiten dituzte Bidebarrin bertara iristen diren pertsonek. Halako hitzarmen eta dirulaguntzekin hiru urte horiek baino lehen jendea lan esparru arruntera bideratu ahal izatea positiboa litzateke: "Gure helburua ez da laneratze enpresa handi bat edukitzea lanpostu pila batekin, baizik eta daudenek rotazioa edukitzea. Hiru urte egon beharrean, lortzen badugu bi urte egotea gurekin eta lan merkatu arruntean sartzea, aukera izango dugu jende gehiagori atenditzeko", dio Bidebarriko Jon Igartuak.
Aurtengo uztailaren 1etik 2020ko ekainaren 30era egiten dituzten kontratuengatik jaso ahal izango dute enpresek dirulaguntza.