Kultura etxeko goiko pisuko gelan sinatu dute akordioa goizean Sabadell banketxeko eta Txanda herriko dendarien elkarteko ordezkariek. Sabadell banketxeak Oñatin duen bulegoko zuzendari Mikel Aranburuk adierazi duen moduan, "herriko komertzioa indartzen laguntzeko" da akordio hau; "egunerokotasunean dendariak behar dituzten zerbitzuek baldintza onak izango dituzte". Adibide moduan aipatu ditu Aranburuk mailegu baten eskaera, dendan dagoen generoaren likidezia egiterakoan behar den diru kopurua eta kreditu txartelarekin erosteak dendariei ekar diezazkien gastuak. Laguntza hauek, gainera, komertzioarendako ez ezik, bertako langile eta senideendako ere badirela gaineratu du Aranburuk.
