Bihartik, egubakoitza, urriaren 27ra bitartean egongo da ikusgai, Arantzazuko Gandiaga Topagunean, Oteiza eta Arantzazuko estatuaria, 1950-1969 erakusketa; Oteizak egindako eraikuntza-lanak egongo dira ikusgai –1950ean hasi zirenetik 1969an amaitu artekoak–. Bihar, egubakoitza, 19:00etan izango da inaugurazio ekitaldia. Arantzazu Gaur Fundazioko ordezkari Juan Biain gonbidatu dute gaurko, eguena, Igo Autobusera! saiora.
Proiektuaren xehetasunak 50 eskultura ingururen bitartez azalduko dira. Horrez gain, Arantzazuko Santutegiko Artxiboko eta Oteiza Museoko Iker-kuntza Zentroko dokumentazio, argazki, prentsa eta ikus-entzunezko ugari ere izango dira.
Bisita gidatua
Erakusketa inauguratzearekin batera, etzi, zapatua, bisita gidatua izango da Gandiaga Topagunean –abuztuan eta urrian izango dira hurrengoak–. 12:00etan hasiko da bisita, eta aurrez izena ematea komeni da, 943 71 65 75 telefonoan. Doakoa izango da eta Elena Martin, erakusketa-proiektuaren komisarioa arituko da gidari lanetan.
