Duela hilabete hasi ziren sinadurak batzen Guardia Zibila Oñatitik joan dadin eskatuz. Gaur ari dira egiten Jare Kuartela eguna eta gaur arte batutako sinadurak politiko eta erakundeetako ordezkariei entregatuko dizkiete, gai hau "serio" hartu eta gaian inplikatzeko.
Janaria eta edaria zuten mahaiak jarri dituzte Foruen plazan goizean eta herriko ekoizleen eta banatzaileen ardoa eta gazta eskaini dituzte, besteak beste. Baita era askotako pintxo edo mokadutxoak ere, herriko elkarte gastronomikoetan gertatutakoak. 13:30ean argazki erraldoia atera dute plazan bertan. Batutako sinadurak eta argazki hori politikoei entregatuko dizkiete. Jare Kuartela herri ekimeneko kideen esanetan Oñatiko udalbatza osatzen duten alderdi bietako ordezkariekin egin dute berba gaiari buruz.
Gauera arte luzatuko da gaurko aldarrikapen eguna. Arratsaldean jolasak egingo dituzte, iluntzean kalejira txarangarekin eta gauean zuzeneko musika emanaldiak gaztetxean.
Oñatiko udaltzaingoak baieztatu duen moduan, bestalde, Covitek kuartel aurrean 15:00etatik 21:00etara elkarretaratzea egiteko eskaera egin du udaltzaingoan.
Terrorismoaren Biktimen Elkarteko kide batzuk 18:30ean heldu dira kuartelaren parera eta elkarretaratzea egin dute han, elkarteko kartelaren atzean, "Oñati inguruan ETAk eraildako zortzi guardia zibilen" argazkiak eskuetan zituztela. Tartean zeuden elkarte horretako EAEko, Logroñoko eta Gaztela Mantxako ordezkariak. "Bi arrazoi hauengatik etorri gara gaur Oñatira: batetik hildako Guardia Zibil horien oroimena omentzeko eta bestetik, esateko ez dugula gura Guardia Zibila hemendik joatea, ezker abertzaleak urtez urte eskaera egiten badu ere. Herri honetan aske ibiltzeko bermea dira elkarteko kideontzat eta jende zintzoarendako", adierazi du Jorge Motak, Terrorismoaren Biktimen Elkarteko EAEko delegatuak.
