Ganbara Faktoriak liburuxka bat atera du, Oñatin izandako industrializazioa oinarri hartuta

Orain bi urte martxan jarritako Oñati Ezagutzen, proiektuaren bigarren edizioa abiatu du Ganbara Faktoriak. Proiektuaren helburua da kultura eta hezkuntza bateratuz eta musika korala aprobetxatuz herriko ondarea ezagutzea. 

Duela bi urte ekimena ermiten ingurukoa izan zen moduan, oraingoan industrializazioa Oñatin izango da landuko duten gaia. Horretarako, herriko industriaren bilakaera jasotzen duen eta bi atal nagusi dituen liburuxka bat kaleratu dute.

Liburuxkaren 2.500 ale atera dituzte, eta ikastetxeetan banatzeaz gain, Kultur etxean eta turismo bulegoan ere egongo da doan eskuragarri. Baina proiektu honen barruan, kontzertu ibiltariak ere eskainiko dituzte Ganbara Faktoria osatzen duten taldeek.