Guardia Zibila Oñatiko kuarteletik joatea eta eraikina herritarren eskura uzteko ekimena da Jare Kuartela. "Pentsatzen dugu Oñatik etekin handiagoa aterako diola kuartelari eraikina hutsik egonda beteta egonda baino. Guardia Zibila iragan ilun batekin lotzen dugu, arrotza zaigu, ez diogu lekurik ikusten herrian eta eskatzen dugu kuartela hutsik gura dugula herritarrok gure intereseko kontuetarako", dio Aitzol Gandiagak.
Erakundeei gai honetan inplikatzeko eta gaia "serio" hartzeko eskatzeko sinadura bilketa hasi dute. "Jendea mugitzen den gunetan egongo gara: azokan, dendetan, taberna inguruetan...", dio Gandiagak.
Ekainaren 15ean egingo da Jare Kuartela eguna Oñatin. Ordura arte luzatuko da sinadura bilketa eta egun horretan erakutsiko dute herritarren aldetik jasotako babesa eta ospakizun ekitaldiak egongo dira Oñatin antolatzen ari diren jaiaren bueltan.
Atzo arratsaldean kultura etxean egindako prentsa agerraldian eman zuten Jare Kuartela ekimenaren berri. Bideo bat ere proiektatu zuten, ekimena babesten duten herritarrekin grabatutakoa. Datozen egunetan erakutsiko dute bideo hori.