Lehen liburu honek Elortzaren biografiaren laburpen txiki bat jasotzen du, elkarrizketa formatuan. "Horretarako, Oinarri elkarte gastronomikoan esertzen ginen mahai batean, eta ia hogei orduko grabaketa egin dugu. Hori da liburuan jaso dudana", dio Biainek.
Idazleak dio aberasgarria izan dela Elortzarekin lan egitea. “Arazo bat dauka Jerardok: gehiegi daki. Lepo gainean daukan disko gogorrak ez dakit ze gaitasun daukan, momentu batzuetan ez sinistekoa ere izan da". Bestalde, eskerrak eman nahi izan dizkie "prozesu honetan lagundu digutenei, erosiko duzuenoi eta erosi gabe irakurriko duzuenoi ere bai".
Elortza, pozik
Hainbat gai jorratzen ditu Elortzaren biografia txiki honek. "Ume garaitik hasi, gazte denborak, Saturraran eta Donostiako seminarioan egon nintzenekoak, ikasle garaikoak, Alemanian egon nintzenekoa eta gerora lan munduan izan ditudan zereginak, bai Bergarako ikastolan, UNED-eko euskara departamenduan, Eusko Jaurlaritzan egin ditudan zenbait lan, ETEOkoak eta erretiroa hartu nuen artekoak. Bueno, erretiroa hartu ostean egin ditudan lantxo batzuk ere agertzen dira", dio.
2018. urteak eman duenarekin pozik azaldu da Elortza, baina atseden apur bat behar duela ere aitortu du. "Aurtengoa lartxo izan da. Ekainekoa ezusteko galanta izan zen, ekintzaz jositako astebete luze bat izan zelako. Denbora asko hartu digu honek eta beste hainbat lan ere eduki ditut, eta badaukat gogoa datorren urtea iritsi eta patxada apur bat hartzeko. Dena den, pozik nago eta eskerrak eman nahi dizkiet bai omenaldia egin zidatenei eta baita liburu honetan lagundu didaten guztiei".
Bihartik aurrera salgai
Liburua bihar jarriko dute salgai, 10 eurotan, Txokolateixian eta herriko liburu-dendetan.
Bilduma honetan, dozena bat liburu inguru argitaratzea aurreikusten dute, guztiak ere Oñatiren historiari lotutakoak. Bigarren liburuari dagokionez, 60. eta 70. hamarkadan etorritako immigranteen ingurukoa izango da, eta martxo ingururako argitaratzea aurreikusten dute.