Oñatiko pentsiodunek diote mobilizazioen "fase berri bati hasiera" ematen dietela orain, kontutan hartuta, aurretik egindako lanak merezi izan duela. Izan ere, adierazi dute azken sei hilabeteetan hiru puntu hauek lortu dituztela: pentsioen %1,6ko igoera, alarguntze-pentsioa kalkulatzeko oinarri-erregulatzailea %52tik %56ra igotzea, eta pentsio txikienak %3 igotzea.
Gaineratu dute euren pentsioen hazkundea, sistema publikoak berma dezakeela, eta ez hainbeste ugaritu diren pentsio pribatuen planek eta fondoek.
Hemendik aurrera, astelehenero egingo dituzte elkarretaratzeak Oñatin 12:00etan Foruen Enparantzan, eta herriko pentsionista guztiek batera egingo dituzte gainera aurrerantzean elkarretaratze horiek.
Arrasatekoek eta Bergarakoek ere bai
Bailarako beste herri nagusienetan ere ondorengo astetan berrekingo diete elkarretaratzeak egiteari. Arrasaten, hurrengo astelehenean, hilaren 10ean, egingo dute oporren bueltako lehenengoa, 12:00etan udaletxe azpian. Bergaran, berriz, San Martin jaien ostean, hilaren 17an, egingo dute lehenengoa, 12:00etan San Martin plazan. Eta Oñatikoek bestetik gogora ekarri dute eurek urriaren 8an, Errosaixo Bixamon egunez, ez dutela egingo.
Urriaren 1ean, egun handia
Agendan daukaten hurrengo ekitaldi nagusiena urriaren 1ean egingo dute, Pertsona Nagusien Nazioarteko Egunean, eta egun hori dela-eta egingo diren mobilizazioetan parte hartuko dutela aurreratu dute Oñatitik, nahiz eta oraindik Pentsiodunen Plataformak hartuko duen erabakien zain dauden.
