goiena.eus

Argazki erraldoia atera dute, Fan Hemendik eguna aurkezteko

  Gizartea  Oñati ALBISTEAK

Fan Hemendik egunaren zortzigarren edizioa aurkeztu dute, eta formatu desberdina erabili dute horretarako. Antolakuntzak azaldu duenez, "azkenaldian horrelako ekimenak antolatzeak ekar ditzakeen ondorioak” direla eta, herritarrak batu eta argazki erraldoi bat egitea erabaki dute, aldarrikapen egun hau babesten dutela adierazteko. Ekainaren 30ean egingo dute.

Antolakuntzatik onartu dute aurkezpenean ez zutela hainbeste jende espero, eta "plazera" dela "horrenbeste jendek" aldarrikapen honekin bat egitea.

Argazki erraldoia atera aurretik, bideo bat erakutsi dute, 2011. urteaz geroztik Fan Hemendik mugimenduak izan duen bilakaera laburbiltzen duena. Horrez gain, bideoan hainbat kritika ere egiten dituzte eta Altsasuko gazteei ere elkartasuna azaldu gura izan diete. Azaldu dute ez dela berria "muntaia judizial eta polizialen erabilera Euskal Herrian” eta “argi gorri guztiak piztu” zirela Altsasuko hainbat gazteren aurkako sarekadaren harira. Aldarrikatu gura izan dute kartzela zigor “zentzugabe eta neurrigabeak” ezarri zaizkiela.

Egun osoko egitaraua

Maletak jarri, giza katea, marrazki bizidunak, antzerkia eta beste hainbat ekintza erabili izan dituzte Guardia Zibilari Oñatitik eta Euskal Herritik joateko eskatzeko, beti ere, manifestazio batekin lagunduta. Aurten ere eutsiko diote aldarriari, eta egun osoko egitarauaren baitan, manifestazioa ere egingo dute. Ondoren, kontzertuak egongo dira, Itziarren Semeak, Gadafiste Brothers, Gorpuzkingz, Broken Legacy eta DJ Elvis Cainoren eskutik.

Parte hartzeko deia

Adierazi dute Guardia Zibilaren presentziak ez daukala “inolako zilegizko justifikaziorik”, eta mugimenduaren aldarrikapenak eragile zein norbanakoen aldetik "inoiz baino babes zabalagoa izan dezan" animatzeko eskaera luzatu dute.

Sarrerak salgai

Bazkarirako sarrerak salgai daude Ona eta Arrano tabernetan. Langileek hamar euro, eta langabetuek sei euro.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa